Sauðfjárræktarfélagið Neisti

Flettingar í dag: 13
Gestir í dag: 8
Flettingar í gær: 46
Gestir í gær: 19
Samtals flettingar: 100943
Samtals gestir: 28604
Tölur uppfærðar: 24.9.2017 10:07:22

19.09.2017 07:58

Hrúta- og sölusýning Neista 2017

Hrúta- og sölusýning Sauðfjárræktarfélagsins Neista í Hörgársveit verður haldin þann 30. september nk að Garðhorni á Þelamörk kl 14-17.  Þar verður m.a. eftirfarandi á dagskrá;

Lambhrútaskoðun.  Keppt verður í flokkunum hvítir hyrndir, mislitir og kollóttir.  Efsti hrútur hlýtur veglegan farandgrip að launum.  Hver bær má koma með einn lambhrút í hvern flokk.  Lambhrútarnir verða stigaðir upp af skagfirska ofurráðunautnum Eyþóri frá Sólheimagerði.  Keppnin í fyrra var gríðarsterk og æsispennandi og höfum við væntingar til þess að hún verði enn betri í ár og í algjörlega öfugu samhengi við umræðu um sauðfjárbúskapinn um þessar mundir.

Fallegasta gimbrin.  Við byrjuðum í fyrra á því að gefa gimbrunum sess í dagskránni og á því verður engin breyting í ár.  Félagsmenn munu mæta með fallegustu gimbrina sína til sýnis og þátttöku í fegurðarsamkeppni.  Ekki er víst að há stigun tryggi sigur heldur mun litur, skreytingar, hornalag, útgeislun og geðslag án efa ráða töluverðu um lokaniðurstöðu.  Gestum og gangandi verður boðin þátttaka í vali á fallegustu gimbrinni. 

Sölusýning og uppboð.  Félagsmenn mæta með sitt úrvalsfé til sölu og sýnis.  Allt endar þetta svo með æsispennandi uppboði á því besta sem Hörgárdalurinn hefur upp á að bjóða í sauðfé.   Þeir félagsmenn sem vilja selja fé sitt á þessum vettvangi þurfa að tilkynna það til Agnars formanns með góðum fyrirvara.

 

Gegn reiðufjárgreiðslu verða veitingar í boði á vegum kvenfélags Hörgdæla.  Farið því í hraðbankann áður en þið mætið.

Handverk, matarkynningar og margt fleira girnilegt á boðstólnum

Takið þátt í skemmtilegum mannlífsviðburði.

Stjórnin

18.09.2017 17:35

Snæfellsnesið kallar !!

Í grófum dráttum lítur ferðin vestur á Snæfellsnes þannig út.  Þátttaka ætlar að verða nokkuð góð og nú hafa um 20 manns skráð sig í ferðina.  

Gera má ráð fyrir að kostnaður per haus verði cirka 20 þúsund krónur (gisting, kvöldverður og rúta) og greiða verður við brottför í reiðufé.

 

Dagskráin verður í grófum dráttum þannig;

 

Miðvikudagur 20 sept

8.00      Lagt af stað frá Þelamerkurskóla

11-12    Stoppað í Staðarskála – hver og einn nærir sig

14.00     Hraunháls

16.00     Gaul

20.00     Kvöldverður á Bjargarsteini (lamb)

Gist verður á Grundarfirði

Fimmtudagur 21 sept

Hamrar, Mávahlíð og Berg í óvæntri röð

Heimsókn í bjórverksmiðju Steðja í Borgarfirði á heimleiðinni

 

Vart þarf að taka það fram að félagið nýtur forgangs í hrúta umfram einstaka félagsmenn.

04.04.2017 16:50

Tölfræðin góða

Hinn árlegi gagnaskammtur frá Eyþóri ráðunaut er nú kominn á heimasíðu Neista á undirsíðunni Skýrslur. 

23.03.2017 09:53

Aðalfundur

Stjórn boðar hér með til aðalfundar í Leikhúsinu á Möðruvöllum mánudaginn 3. apríl n.k. kl 20.30.

 
Dagskrá;
 

  1: Fundarsetning.

  2: Skipun fundarstjóra og ritara

  3 : Inntaka og úrsögn félaga

  4: Skýrsla stjórnar og reikningar fyrir árið 2016

  5: Kosningar. A) 1 mann í stjórn til þriggja ára. B) 2 varamenn í stjórntil eins árs.

       C) Tvo skoðunarmenn til tveggja ára ogeinn til vara

  6: Yfirlit um skýrsluhaldið - Eyþór Einarsson

  7: Önnur mál

  8:  Fundarslit

22.12.2016 15:29

Bjarnastaða-Biskup allur

Bjarnastaða-Biskup kærði sig ekki lengur um að sinna ám félagsmanna og kvaddi fjárheima nú í morgun......

24.11.2016 08:24

Niðurröðun hrúta

Á fundi félagsins þann 23. nóvember var eftirfarandi niðurröðun hrúta félagsins ákveðin.  Mikilvægt er að ef viðkomandi bær sér ekki fært að nýta hrútana eins og óskað var eftir að þá verði aðrir bæir sitt hvoru megin við viðkomandi í skipulaginu látnir vita.  Best er að hringja beint í viðkomandi eða gera grein fyrir breytingu á fésbókarsíðu félagsins þar sem þessi frétt birtist.

 

Bær Tímabil Hrókur Riddari Mökkur Biskup
Garðshorn 1-3 des X X X  
Rauðilækur 1-4 des X X X X
Skriða 5-9 des X X    
Þverá 12.des     X X
S-Bægisá 11-14 des X      
Þrastarhóll 14-15 des     X X
Þúfnavellir 15-16 des   X    
Auðnir 15-16 des X     X
S-Bægisá 16 og síðar     X  
S-Bægisá 17 og síðar       X
Brakandi 20-21 des   X X  
Kjarni 20 síðar X X    

11.11.2016 17:17

Nýir félagshrútar

 

16-151 Riddari frá Broddanesi

49-105-32-3,8-3,5 / 8-8,5-8,5-8,5-9-19-8-8-8,5 alls 86 stig

Kynbótamat  122-96-91-95

 

16-152 Hrókur frá Árbæ

50-108-33-2,8-5 / 8-9-8,5-9-9,5-19,5-8,5-8-8 alls 88 stig

Kynbótamat 115-97-100-105

 

16-385 Biskup frá Bjarnastöðum

53-112-37-3,0-5,0 /  8-9-9-9,5-9,5-19-7,5-8-8,5 alls 88 stig

Kynbótamat 116-104-97-98

 

Frekari upplýsingar og ættartré er hægt að nálgast í Fjárvís með því að velja;

Kynbótamat -> Hrútar -> Fjárræktarfélagshrútur -> Lifandi  og skoða framangreind gripanúmer

10.11.2016 13:40

Hrútafundur

Fengitíð er ekki langt undan og því tímabært að kalla félagsmenn til fundar og fara yfir hrútamál félagsins sem sjaldan hefur verið meiri að umfangi. Ebiti er kominn á stöð og tveir nýir kollar keyptir í vesturferðinni miklu.  Félagið hefur einnig tryggt sér kauprétt á hvítum hyrndum úr Öxarfirðinum og Mökkur klár í sitt annað ár í þjónustu fyrir félagsmenn.   Meira um þetta á fundinum sjálfum en í aðdraganda hans verða myndir og upplýsingar um þessa nýju hrúta afhjúpaðar.

 

Hvetjum alla til að mæta.

 

Fundarstaður er Leikhúsið á Möðruvöllum og fundartími er miðvikudagurinn 23. nóvember kl 20,30.

 

11.10.2016 14:32

Hrúta- og sölusýning afstaðin

Fjöldi manns lagði leið sína í Skriðu á hrúta- og sölusýningu félagsins þetta haustið en nokkrar breytingar voru gerðar á fyrirkomulagi sýningarinnar að þessu sinni og mæltust almennt vel fyrir. 

Helstu úrslit voru eftirfarandi;

Í flokki hyrndra lambhrúta sigraði hrútur frá Barká og var dómur þannig (sama röð í í Fjárvís) ;

46-33-3,8-5-106-8-8,5-8,5-9-9-19-9-8-8 alls 87 stig

Í öðru sæti var hrútur frá Möðruvöllum og í þriðja sæti var hrútur frá Stóru-Hámundarstöðum.

 

Í flokki mislitra lambhrúta sigraði hrútur frá Gásum og var dómur hans þannig

63-30-4,7-5-108-8-9-9,5-9-9-18,5-8-8-9 alls 88 stig

Í öðru sæti var hrútur frá Neðri-Rauðalæk og því þriðja var hrútur frá Stóra-Dunhaga

 

Í flokki kollóttra lambhrúta sigraði hrútur frá Stóra-Dunhaga með

56-29-75-4-110-8-9-9-8-9-19-7,5-8-9 alls 86,5 stig

Í öðru sæti var hrútur frá Kjarna og í þriðja sæti hrútur frá Neðri-Rauðalæk

Sigurvegarar í þessum flokkum fengu viðurkenningarplagg auk gjafa frá Líflandi.

 

Besti lambhrúturinn var valinn sá sem sigraði flokk mislitra lambhrúta og fékk eigandi hans veglegan farandgrip að launum sem Kristbjörg á Vindheimum smíðaði.

Nýlunda er að veita gimbrum verðlaun en að þessu sinni voru veitt verðlaun fyrir best gerðu gimbrina sem og fallegustu gimbrina.  Líkt og með lambhrútana var það Auðbjörn á Gásum sem ræktaði best gerðu gimbrina og var dómur hennar þannig;

30-7,4-4-108-9-18,5-9

Jafnframt fengu gestir að velja fallegustu gimbrina og heillaði flekkótt vel gerð og vel skreytt gimbur frá Neðri-Rauðalæk gestina mest.

Stjórn Neista vill þakka þátttakendum og gestum fyrir að gera þetta allt saman að virkilega góðum og skemmtilegum degi.

Við vísum eins og oft áður á myndir af viðburðinum á heimasíðu Birgittu á Möðruvöllum en hún er mun færari og duglegri en stjórnarmenn með myndavélina. 

http://molinn62.123.is/blog/2016/10/09/755378/

Minnum á að Neisti er á fésbókinni og gott er að fylgjast með á þeim vettvangi.

  • 1

Tenglar