Sauðfjárræktarfélagið Neisti

Flettingar í dag: 39
Gestir í dag: 15
Flettingar í gær: 61
Gestir í gær: 20
Samtals flettingar: 131767
Samtals gestir: 36234
Tölur uppfærðar: 18.10.2018 17:02:32

06.10.2018 22:20

Úrslit í hrútakeppni Neista 2018

Birgitta okkar var svo snögg til að lista upp úrslit í hrútakeppni Neista sem haldin var í dag að við erum ekkert að endurtaka það sem þar kemur fram og vísum á neðangreindan tengil.

Stjórn Neista vill þakka gestum og keppendum fyrir þátttöku í hrútadegi félagsins þetta árið.

http://molinn62.123.is/blog/2018/10/06/786032/

29.09.2018 16:26

Fjár(upp)kaupaferðin 2018

Ágætu ferðamenn,

 

Nú liggur fyrir gróft skipulag á fjár(upp)kaupaferðinni vestur á Strandir.  

 

Mánudagur 1 okt

Brottför frá Þelamerkurskóla stundvíslega kl 8.  Ekið verður eins og druslan drífur alla leið norður í Trékyllisvík með einu stoppi en þar verður hið margrómaða Melabú heimsótt.  Áætluð koma á þann áfangastað er um kl 14.  Því næst verður komið við í bakaleiðinni á hinu magnaða Bassastaðabúi sem er rétt norðan Hólmavíkur.  Þar ku vera afbragðs gott og vænt hyrnt fé sem nýbúið verður að stiga þegar við mætum.  Þaðan förum við á gerðarbúið í Broddanesi en á samnefndu gistiheimili eigum við náttstað.  Þar eldum við í okkur sjálf og að sjálfsögðu verða hörgdælsk lambalæri á boðstólunum. 

 

Þriðjudagur 2 okt

Að loknum morgunmat höldum við á Smáhamra og áætlum lendingu þar kl 10.30.  Heydalsá verður næst fyrir barðinu á okkur en svo rennum við á Hólmavík og hver og einn fær sér eitthvað að borða þar í Kaupfélaginu.  Á leiðinni í Árbæ ætlum við svo að líta við í Miðdalsgröf en við gerum ráð fyrir því að vera komin í Árbæ kl 15,30 á þriðjudeginum.  Heimkoma er svo á þriðjudagskvöld á ótilgreindum tíma.

 

Við minnum ferðalanga á að fara í hraðbanka og taka með sér  fjárfestinga- og eyðslufé þar sem gera verður ráð fyrir umtalsverðu magni fjárfestingavalkosta.

 

Rútan er full og því góð mæting og greinilega engan bilbug að finna á Neistungum þetta haustið.

 

Sjáumst hress á mánudagsmorgun,

 

Stjórnin

 

28.09.2018 12:56

Hrúta- og sölusýning 2018

Hrúta- og sölusýning Fjárræktarfélagsins Neista í Hörgársveit verður haldin laugardaginn 6 október nk að Garðhorni á Þelamörk kl 14-17.  Þar verður m.a. eftirfarandi á dagskrá;

 

Lambhrútaskoðun.  Keppt verður í flokkunum hvítir hyrndir, mislitir og kollóttir.  Efsti hrútur hlýtur veglegan farandgrip að launum.  Hver bær má koma með einn lambhrút í hvern flokk.  Lambhrútarnir verða stigaðir upp af ráðunaut.  Keppnin í fyrra var sterk og æsispennandi.

 

Fallegasta gimbrin.  Félagsmenn munu mæta með fallegustu gimbrina sína til sýnis og þátttöku í fegurðarsamkeppni.  Ekki er víst að há stigun tryggi sigur heldur mun litur, skreytingar, hornalag, útgeislun og geðslag án efa ráða töluverðu um lokaniðurstöðu.  Gestum og gangandi verður boðin þátttaka í vali á fallegustu gimbrinni. 

 

Sölusýning og uppboð.  Félagsmenn mæta með sitt úrvalsfé til sölu og sýnis.  Allt endar þetta svo með æsispennandi uppboði á því besta sem félagsmenn Neista hafa upp á að bjóða í sauðfé.  Þeir félagsmenn sem vilja selja fé sitt á þessum vettvangi þurfa að tilkynna það til Agnars formanns 899-8886 (agnar75@hotmail.com) með góðum fyrirvara og tryggja sér þar með sölukró.

 

Gegn reiðufjárgreiðslu verða veitingar í boði á vegum Kvenfélags Hörgdæla.  Farið því í hraðbankann áður en þið mætið.

Eitthvað fleira áhugavert kann að verða til sölu á staðnum.

 

Takið þátt í skemmtilegum mannlífsviðburði

13.04.2018 11:29

Aðalfundur Neista - miðvikudag 18. apríl kl 20,30

Stjórn boðar hér með til aðalfundar í Leikhúsinu á Möðruvöllum miðviudaginn 18. apríl n.k. kl 20.30.  Stjórn biður félagsmenn sérstaklega að huga að hugmyndum um framtíð og tilgang félagsins fyrir utan venjubundin aðalfundarstörf.

 
Dagskrá;
 

  1: Fundarsetning.

  2: Skipun fundarstjóra og ritara

  3 : Inntaka og úrsögn félaga

  4: Skýrsla stjórnar og reikningar fyrir árið 2017

  5: Kosningar. A) 1 mann í stjórn til þriggja ára. B) 2 varamenn í stjórntil eins árs.

       C) Tvo skoðunarmenn til tveggja ára ogeinn til vara

  6: Önnur mál

  7:  Fundarslit

30.11.2017 13:25

Niðurröðun hrúta 2017

Hér sjá félagar lista yfir pantanir á félagshrútum.  Listinn veðrur uppfærður ef breytingar verða.

 

 
 

28.11.2017 22:46

Getraun dagsins

Á þessari mynd eru tveir lambhrútar.  Annar þeirra er hinn nýji félagshrútur sem hlotið hefur nafnið Drangi.  Sá hrútur er með 18,5 stig fyrir læri en hinn hrúturinn er með hvorki meira né minna en 20 í læri.  Hvor hrúturinn er með 20 fyrir læri?

 

27.11.2017 17:30

Hrútafundur 2017 (taka II)

Neistverjar eru ábyggilega búnir að grafa sig út eftir óveðrið síðustu daga og því skellum við á í snarhasti hrútafundinum sem aflýst var s.l. fimmtudag.  Fundarstaður er Leikhúsið á Möðruvöllum og tímasetningin er kl 20.30 annað kvöld (þriðjudaginn 28. nóvember)

 

Sjáumst hress,

 

Stjórnin

23.11.2017 10:03

Hrútafundi frestað

Fyrirhugðum hrútafundi í kvöld er frestað vegna veðurs og veðurútlits.  Ný fundarboðun send út síðar.

18.11.2017 17:33

Hrútafundur 2017

Stjórn boðar til hrútafundar fimmtudagskvöldið 23. nóvember nk. í leikhúsinu á Möðruvöllum kl 20.30.

Hrútar félagsins kynntir og þeim raðað niður.  Heyrst hefur að slegist verði um pláss undir hrútana þennan veturinn og því eins gott fyrir félagsmenn að mæta og tryggja sér erfðaefni úr þessum kostagripum.

Fjölmennum og sjáumst hress......

14.11.2017 08:23

Nýr hyrndur hrútur

Félagið reif upp veskið nú í haust og fjárfesti í föngulegum hvítum hyrndum hrút frá Skriðu.  Hann hefur enn ekki hlotið nafn og verður væntanlega skírður á fyrirhuguðum hrútafundi félagsins sem haldinn verður fljótlega.  Um þennan hrút er hægt að segja að hann taki sig vel út, er fallegur á fæti og mun ábyggilega reynast félagsmönnum vel.  Hrúturinn er undan Gulla frá Skriðu sem er heimaræktaður hrútur en þó með sæðingahrúta í 3ja ættlið.  Gulli þessi er m.a. með 19 stig fyrir læri og 87 stig í heildina.  Móðirin er Dannadóttir en sá hrútur var frá Sveinungsvík og staldraði stutt við á stöð en skildi þó eftir sig spor sem eftir er tekið.  Móðurmóðurætt er frá því ágæta búi Staðarbakka.

 

Stigun lambhrútsins er þessi (í sömu röð og í Fjárvís

58-106-32-5,1-4-8-8,5-9,5-9-9-18,5-9-8-8,5=88 stig

Blup er 118-102-99-103

Nú er bara að fjölmenna á fyrirhugaðan hrútafund félagsins sem boðaður verður bráðlega og tryggja sér aðgengi að hrútum félagsins þennan veturinn.

 
  • 1

Tenglar